2 Timoseewo  

Essuula 1

1 Pawulo, omutume wa Kristo Yesu olw'okwagala kwa Katonda, ng'okusuubiza bwe kuli okw'obulamu obuli mu Kristo Yesu,
2 eri Timoseewo, omwana wange omwagalwa: ekisa, okusaasira, emirembe ebiva eri Katonda Kitaffe ne Kristo Yesu Mukama waffe bituuke gy'oli.
3 Nneebaza Katonda gwe mpeereza okuva ku bajjajjange mu mwoyo omulungi, bwe nkujjukira obutayosa mu kusaba kwange emisana n'ekiro
4 nga nkulumirwa okukulaba, bwe njijukira amaziga go, ndyoke njijule essanyu;
5 bwe nnajjukizibwa okukkiriza okutali kwa bukuusa okuli mu ggwe; okwabeeranga olubereberye mu jjajjaawo Looyi ne mu nnyoko Ewuniike, era ntegeeredde ddala nga kuli ne mu ggwe.
6 Kyenva nkujjukiza okuseesanga ekirabo kya Katonda ekiri mu ggwe olw'okuteekebwako emikono gyange.
7 Kubanga Katonda teyatuwa ffe omwoyo ogw'okutya, wabula ogw'amaanyi era ogw'okwagala era ogw'okwegenderezanga.
8 Kale, tokwatirwanga nsonyi kutegeeza kwa Mukama waffe, newakubadde nze omusibe we: naye obonyaabonyezebwanga wamu n'enjiri ng'amaanyi ga Katonda bwe gali;
9 eyatulokola n'atuyita okuyita okutukuvu, si ng'ebikolwa byaffe bwe biri, wabula okumalirira kwe ye n'ekisa bwe biri, kye twaweerwa mu Kristo Yesu emirembe n'emirembe nga teginnabaawo,
10 naye kirabisibwa kaakano olw'okwolesebwa kw'Omulokozi waffe Kristo Yesu, eyaggyawo okufa n'amulisa obulamu n'obutazikirira olw'enjiri,
11 gye nnateekerwawo omubuulizi era omutume era omuyigiriza.
12 Era kyenva mbonaabona bwe ntyo: naye sikwatibwa nsonyi; kubanga mmanyi gwe nnakkiriza, ne ntegeerera ddala ng'ayinza okukuumanga kye nnamuteresa okutuusa ku lunaku luli.
13 Nywezanga ekyokulabirako eky'ebigambo eby'obulamu bye wawuliranga gye ndi, mu kukkiriza ne mu kwagala okuli mu Kristo Yesu.
14 Ekintu ekirungi kye wateresebwa okikuumenga n'Omwoyo Omutukuvu, abeera muffe.
15 Kino okimanyi nga bonna abali mu Asiya bankuba amabega; ku abo ye Fugero ne Kerumogene.
16 Mukama waffe asaasire ennyumba ya Onesifolo: kubanga yampummuzanga emirundi mingi, so teyakwatirwa nsonyi lujegere lwange,
17 naye bwe yali mu Ruumi n'anyiikira okunnoonya n'okulaba n'andaba
18 (Mukama waffe amuwe okulaba okusaasirwa eri Mukama waffe ku lunaku luli); era n'okuweereza kwonna kwe yaweerezanga mu Efeso, ggwe okutegeera bulungi nnyo.
   

Essuula 2

[Ddayo waggulu]
1 Kale ggwe, mwana wange, beeranga wa maanyi mu kisa ekiri mu Kristo Yesu.
2 Era bye wawuliranga gye ndi mu bajulirwa abangi, ebyo biteresenga abantu abeesigwa, era abalisaanira okuyigiriza n'abalala.
3 Bonaboneranga wamu nange ng'omulwanyi omulungi owa Kristo Yesu.
4 Siwali mulwanyi bw'atabaala eyeeyingiza mu mitawaana egy'obulamu buno, alyoke asiimibwe eyamuwandiika okuba omulwanyi.
5 Naye era omuntu bw'awakana, taweebwa ngule bw'atawakana nga bwe kiragirwa.
6 Omulimi akola emirimu kimugwanira okusooka okutwala ku bibala.
7 Lowooza kye njogedde; kubanga Mukama waffe anaakuwanga okutegeera mu bigambo byonna.
8 Jjukira Yesu Kristo, nga yazuukira mu bafu, ow'omu zzadde lya Dawudi, ng'enjiri yange bw'eyogera:
9 gye mbonaboneramu okutuusa ku kusibibwa, ng'akola obubi; naye ekigambo kya Katonda tekisibibwa.
10 Kyenva ngumiikiriza byonna olw'abalonde, era nabo balyoke bafune obulokovu obuli mu Kristo Yesu, wamu n'ekitiibwa ekitaggwaawo.
11 Ekigambo kino kyesigwa nti Kuba oba nga twafa naye, era tulibeera balamu naye
12 oba nga tugumiikiriza, era tulifuga naye: oba nga tulimwegaana era naye alitwegaana ffe:
13 oba nga tetukkiriza, ye abeera mwesigwa kubanga tayinza kwerimba.
14 Ebyo obibajjukizanga, ng'obakuutirira mu maaso ga Mukama waffe, obutalwananga na bigambo ebitagasa, ebikyamya abawulira
15 Fubanga okweraga ng'osiimibwa Katonda, omukozi atakwatibwa nsonyi, ayisa wakati ekigambo eky'amazima.
16 Naye ebigambo ebitaliimu ebitali bya ddiini obye walanga: kubanga baliyitirira mi butatya Katonda,
17 n'ekigambo kyabwe kirirya nga kookolo: ku abo ye Kumenayo ne Fireeto;
18 kubanga baakyama mu mazima, nga boogera ng'okuzuukira kwamala okubeerawo, era waliwo abantu be baavuunikirira okukkiriza kwabwe
19 Naye omusingi gwa Katonda omugumu gubeerawo, nga gulina akabonero kano nti Mukama waffe amanyi ababe: era nti Yeewalenga obutali butuukirivu buli ayatula erinnya lya Mukama waffe
20 Naye mu nnyumba ennene temubaamu bintu bya zaabu na bya ffeeza byokka, naye era n'eby'emiti n'eby'ebbumba; n'ebirala eby'ekitiibwa, n'ebirala ebitali bya kitiibwa
21 Kale omuntu bwe yeerongoosaako ebyo, anaabeeranga ekintu eky'ekitiibwa, ekyatukuzibwa, ekisaanira omwami okuweerezanga ekyalongooserezebwa buli mulimi omulungi.
22 Naye okwegomba okw'omu buvubuka okwewalanga naye ogobereranga obutuukirivu okukkiriza, okwagala, emirembe awamu n'abo abamusaba Mukama waffe mu mwoyo omulongoofi:
23 Naye omuddu wa Mukama waffe tekimugwanira kulwananga, wabula okubeeranga omukkakkamu eri bonna, omuyigiriza, omugumiikiriza,
24 abuulirira n'obuwombeefu abawakanyi, mpozzi oba nga Ka tonda alibawa okwenenya olw'okutegeerera ddala amazima,
25 era balitamiirukuka okuva mu mutego wa Setaani, oyo ng'amaze okuakwasa okukolanga okwagala kw'oli.
   

Essuula 3

[Ddayo waggulu]
1 Naye tegeera kino nga mu nnaku ez'oluvannyuma ebiro eby'okusba ennaku birijja.
2 Kubanga bantu baliba nga beeyagala bokka, baagala ebintu, abeenyumiriza, b'amalala, abavumi, abatagondera bazadde baabwe, abateebaza, abatali batukuvu,
3 abatayagala ba luganda, abatatabagana, abawaayiriza, bateegendereza, abakambwe, abaayagala bulungi,
4 ab'enkwe, abaakanyavu, abeegulumiza, abaagala ssanyu okusinga Katonda;
5 nga balina ekifaananyi ky'okutya Katonda, naye nga beegaana amaanyi gaakwo: era nabo obakubanga amabega.
6 Kubanga ku abo be bantu basensera mu nnyumba ne banyaga bakazi abasirusiru abazitoowererwa bibi ebingi, abafugibwa okwegomba okutali kumu,
7 abayiga bulijjo, ne batayinza ennaku zonna kutuuka ku kutegeerera ddala mazima.
8 Era nga Yane ne Yambere bwe baaziyiza Musa, ne bano bwe batyo baziyiza amazima; bayonooneka amagezi gaabwe, abatasiimibwa mu kukkiriza.
9 Naye tebalyeyongerako kuyitirira: kubanga obusirusiru bwabwe bulitegeeerwa ddala abantu bonna, era ng'owa bali bwe bwali.
10 Naye gwe wagoberera nnyo okuyigiriza wange, empisa zange, okuteesa wange, okukkiriza kwange, okuumiikiriza kwange, okwagala kwage, okulindirira kwange,
11 okuyigganyizibwa kwange, okubonaabona kwange; ebyambeerako mu Antiyokiya, mu Ikoniyo, mu Lusitula; okuyigganyizibwa kwe nnayigganyizibwanga bwe kwali: era Mukama waffe yandokola mu byonna.
12 Naye era bonna abaagala mu Kristo Yesu okukwatanga empisa ez'okutya Katonda banaayigganyizibwanga.
13 Naye abantu ababi n'abeetulinkirira balyeyongera okuyitiriranga mu bubi, nga balinba era nga balimbibwa.
14 Naye ggwe beeranga mu ebyo bye wayiga n'otegeerera ddala, ng'omanyi bakuyigiriza bwe bali;
15 era ng'okuva mu buto wamanyanga ebyawandiikibwa ebitukuvu ebiyinza okukugeziwaza okuyingira mu bulokovu olw'okukkiriza okuli mu Kristo Yesu.
16 Buli ekyawandiikibwa kirina okuluŋŋamya kwa Katonda, era kigasa olw'okuyigirizanga, olw'okunenyanga, olw'okutereezanga, olw'okubuulira okuli mu butuukirivu;
17 omuntu wa Katonda alemenga okubulwa kyonna kyonna, ng'alina ddala byonna olwa buli mulimu omulungi.
   

Essuula 4

[Ddayo waggulu]
1 Nkukuutirira mu maaso ga Katonda ne Kristo Yesu; alisalira omusango abalamu n'abafu, era n'olw'okulabika kwe n'obwakabaka bwe;
2 buuliranga ekigambo; kubiririzanga mu bbanga erisaaniramu n’eritasaaniramu; weranga, nenyanga, buuliriranga n'okugumiikiriza kwonna n'okuyigiriza.
3 Kubanga ebiro birijja lwe batalikkiriza kuwulira kuyigiriza kwa bulamu; naye, amatu aga gabasiiwa, balikuŋŋaanya abayigiriza ng'okwegomba kwabwe bo bwe kuli;
4 baliziba amatu okulekanga amazima, balikyama okugobereranga enfumo obufumo.
5 Naye ggwe tamiirukukanga mu byonna, bonaabonanga, kolanga omulimu ogw'omubuulizi w'enjiri, tuukirizanga okuweereza kwo.
6 Kubanga nze kaakano nfukibwa, n'ebiro eby'okuteebwa kwange bituuse.
7 Nnwanye okulwana okulungi, olugendo ndutuusizza, okukkiriza nkukuumye:
8 ekisigaddeyo, enterekeddwa engule ey'obutuukirivu Mukama waffe gy'alimpeera ku lunaku luli, asala emisango egy'ensonga: so si nze nzekka. naye era ne bonna abaagala okulabika kwe.
9 Fuba okujja gye ndi mangu:
10 kubanga Dema yandekawo, ng'ayagala emirembe egya kaakano, n'agenda e Ssessaloniika; Kulesuke e Ggalatiya, Tito e Dalumatiya.
11 Lukka ye ali awamu nange yekka. Twala Makko, omuleete wamu naawe;.kubanga angasa olw'okuweereza.
12 Naye Tukiko nnamutuma mu Efeso.
13 Ekyambalo kye nnaleka mu Tulowa ewa Kappo, bw'oliba ng'ojja, kireete, n'ebitabo, naye, okusinga, biri eby'amaliba.
14 Alegezanda omuweesi w'ebikomo yankola obubi bungi: Mukama waffe alimusasula ng'ebikolwa bye bwe byali:
15 oyo naawe omwekuumanga; kubanga yaziyiza nnyo ebigambo byaffe.
16 Mu kuwoza kwange okw'olubereberye siwali eyannyamba, naye bonna banjabulira: nsaba baleme okukibalirwa.
17 Naye Mukama waffe yayimirira kumpi nange, n’ampa amaanyi; nze ndyoke atuukirize kye mbuulira, era ab'amawanga bonna balyoke bawulire: ne ndokoka mu kamwa k'empologoma.
18 Mukama waffe anandokolanga mu buli kikolwa ekibi, era anankuumanga okutuusa ku bwakabaka bwe obw'omu ggulu: aweebwenga ekitiibwa emirembe n'emirembe. Amiina.
19 Lamusa Pulisika ne Akula, n'ennyumba ya Onesifolo.
20 Erasuto yabeera mu Kkolinso: naye Tulofiimo nnamuleka mu Mireeto ng'alwadde.
21 Fuba okujja ebiro by'empewo nga tebinnatuuka. Ewubulo akulamusizza, ne Pudente, ne Lino, ne Kulawudiya, n'ab'oluganda bonna.
22 Mukama waffe abeerenga n'omwoyo gwo: Ekisa kibeerenga nammwe.
   

Next
Back