Abafiripi  

Essuula 1

1 Pawulo ne Timoseewo, abaddu ba Kristo Yesu, eri abatukuvu bonna mu Kristo Yesu abali mu Firipi, wamu n'abalabirizi n'abaweereza:
2 ekisa kibeerenga gye muli n'emirembe ebiva eri Katonda Kitaffe ne Mukama waffe Yesu Kristo.
3 Nneebaza Katonda wange buli lwe mbajjukira,
4 ennaku zonna buli lwe mbasabira mwenna nsaba n'essanyu,
5 olw'okussa ekimu kwammwe okw'okubunya enjiri okuva ku lunaku olw'olubereberye okutuusa kaakano;
6 nga ntegeeredde ddala kino ng'oyo eyatandika omulimu omulungi mu mmwe aligutuukiriza okutuusa ku lunaku lwa Yesu Kristo:
7 nga bwe kiri ekirungi nze okulowoozanga ekyo gye muli mwenna, kubanga ndi nammwe mu mutima gwange, bwe mussa ekimu mwenna awamu nange mu kisa, mu kusibibwa kwange era ne mu kuwolerezanga enjiri n'okuginywezanga.
8 Kubanga Katonda ye mujulirwa wange, bwe mbalumirwa omwoyo mwenna mu kusaasira kwa Kristo Yesu.
9 Era kino kye asaba okwagala kwammwe kweyongereyongerenga kusukkirirenga mu kutegeera n'okwawula kwonna:
10 mulyoke musiimenga ebisinga obulungi; mubeerenga abatalina bukuusa era abatalina kabi okutuusa ku lunaku lwa Kristo;
11 nga mujjudde ebibala eby'obutuukirivu, ebiriwo ku bwa Yesu Kristo, Katonda aweebwe ekitiibwa, atenderezebwe.
12 Naye njagala mmwe okutegeera, ab'oluganda, ng'ebyambaako byajja lwa kubunya bubunya enjiri;
13 n'okusibibwa kwange ne kulyoka kuIabika mu Kristo eri basserikale bonna aba kabaka, n'abalala bonna;
14 n'ab'oluganda abasinga obungi mu Mukama waffe ne balyoka baguma olw'okusibwa kwange ne beeyongeranga nnyo okwaŋŋanga okubuuliranga ekigambo kya Katonda nga tebatya.
15 Abalala babuulira Kristo lwa buggya n'okuyomba; era n'abalala bamubuulira lwa kisa:
16 bano babuulira lwa kwagala, nga bamaayi nga nnateekebwawo lwa kuwolerezanga enjiri:
17 naye bali babuulira Kristo olw'okuyomba, si mu mazima, nga balowooza okundeetera ennaku mu kusibibwa kwange.
18 Naye n'ekyo asonga? wabula nga mu ngeri zonna, oba mu bukuusa oba mu mazima, Kristo abuulirwa; n'ekyo nkisanyukidde, weewaawo era ndisanyuka.
19 Kubanga mmanyi ng'ekyo kirinviiramu obulokozi olw'okusaba kwammwe n'okuweebwa Omwoyo wa Yesu Kristo,
20 nga bwe ntunuulira ennyo ne asuubira nga ssirikwatibwa nsonyi mu kigambo kyonna, wabula nga Kristo, ennaku zonna, era ne kaakano anaagulumizibwanga mu mubiri gwange mu buvumu bwonna, oba mu bulamu oba mu kufa.
21 Kubanga gye ndi okuba omulamu ye Kristo, n'okufa ge magoba.
22 Naye oba ng'okuba omulamu mu mubiri, okwo nga kye kibala eky'omulimu gwange, kale ssimanyi kye nneeroboza.
23 Naye nziyizibwa enjuyi zombiriri, nga nneegomba okugenda okubeera ne Kristo; kubanga kwe kusinga ennyo nnyini:
24 naye okubeera mu mubiri kwe kusinga okwetaagibwa ku lwammwe:
25 Era, kubanga ntegeeredde ddala bwe ntyo, mmanyi nga ndibeera, era ndibeera wamu nammwe mwenna, olw'okuyitirira kwammwe n'okusanyuka olw'okukkiriza:
26 okwenyutniriza kwammwe kulyoke kusukkirire mu Kristo Yesu ku bwange, nze olw'okujja gye muli nate.
27 Naye kyokka okutambula kwammwe kubeerenga nga bwe kigwanira enjiri ya Kristo: bwe ndijja okubalabako oba nga ssiriiwo, ndyoke mpulire ebifa gye muli, nga munywedde mu mwoyo gumu, nga mulwaniriranga okukkiriza okw'enjiri n’emmeeme emu;
28 so nga temukangibwa balabe mu kigambo kyonna: ke kabonero ddala gye bali ak'okuzikirira, naye er mmwe ka bulokozi, era obuva era Katonda;
29 kubanga mwaweebwa ku lwa Kristo si kumukkiriza kwo kka, era naye n'okubonaabonanga ku lulwe:
30 nga mulina okulwana kuli kwe mwalaba gye ndi, era kwe muwulira kaakano okuli gye ndi.
   

Essuula 2

[Ddayo waggulu]
1 Kale oba nga waliwo okukubagiza kwonna mu Kristo, oba ng'okusanyusa kwonna okw'okwagala, oba ng'okussa ekimu kwonna okw'Omwoyo, oba ng'okusaasira n'ekisa,
2 mutuukirize essanyu lyange mulowoozenga bumu, nga mulina okwagala kumu, omwoyo gumu nga mulowooza bumu;
3 temukolanga kintu kyonna olw'okuyomba newakubadde olw'ekitiibwa ekitaliimu, wabula mu buwombeefu buli muatu agulumizenga munne okusinga bwe yeegulumiza yekka;
4 temutunuuliranga buli muntu ebibyo yekka, era naye buli muntu n'eby'abalala.
5 Mmwe mubeerengamu okulowooza kuli, era okwali mu Kristo Yesu;
6 oyo bwe yasook, okubeera mu kifaananyi kya Katonda, teyalowooza kintu ekyegombebwa okwenkanankana ne Katonda,
7 naye yeggyako ekitiibwa, bwe yatwala engeri y'omuddu, n'abeera mu kifaananyi ky'abantu;
8 era bwe yalabikira mu mutindo ogw'obuntu, ne yeetoowaza, nga muwulize okutuusa okufa, era okufa okw'oku musalaba.
9 Era Katonda kyeyava amugulumiza ennyo n'amuwa erinnya liri erisinga amannya gonna;
10 buli vviivi lifukaamirirenga erinnya lya Yesu, ery'eby'omu ggulu n'eby'oku nsi n'ebya wansi w'ensi,
11 era buli lulimi lwatulenga nga Yesu Kristo ye Mukama waffe, Katonda Kitaffe aweebwe ekitiibwa.
12 Kale, abaagalwa bange, nga bwe mwawuliranga ennaku zonna, si nga nze lwe mbeerawo lwokka, naye kaakano okusinga ennyo nga ssiriiyo, mutuukirizenga obulokozi bwammwe bennyini n'okutya n'okukankana;
13 kubanga Katonda yakoza mu mmwe okwagala n'okukola, olw'okusiima kwe okulungi.
14 Mukolenga byonna awatali kwemulugunyanga n'empaka;
15 mulemenga okubaako kye munenye;ebwa newakubadde ettima, abaana ba Katonda abatalina mabala wakati n'emirembe egyakyama emikakaiyavu, gye mulabikiramu ng'ettabaaza z'omu nsi,
16 nga mwolesa ekigambo eky'obulamu; ndyoke nbeere n'okwenyumiriza ku lunaku wa Kristo, kubanga ssaddukira bwereere, so ssaafubira bwereere.
17 Naye newakubadde nga nfukima ku ssaddaaka n'okuweereza okw'okukkiriza kwammwe, nsanyuka era nsanyukira wamu nanmwe mwenna:
18 era nammwe me mutyo musanyuke era musanyukire wamu nange.
19 Naye nsuubira mu Mukama waffe Yesu, okubatumira amangu Timoseewo, nange ndyoke ngume omwoyo, bwe ndimala okutegeera ebifa gye muli.
20 Kubanga sirina muntu mulala alina emmeeme eyenkana n'ey'oyo, aligenderera ebya mmwe mu mazima.
21 Kubanga bo bonna beenoonyeza byabwe ku bwabwe, si bya Yesu Kristo.
22 Naye ekimutegeezesa mukimanyi, nga aweerezanga wamu nange olw'enjiri, ng'omwana eri kitaawe.
23 Kale oyo nsuubira okumutuma mangu, kyokka bwe ndimala okusba ebifa gye ndi:
24 naye nsuubira mu Mukama waffe nti nange ndijja mangu.
25 Naye nnalaba nga #331;ŋwanye okubatumira Epafuloddito muganda wange, era mukozi munange, era mulwanyi munnange, naye ye mutume wammwe era omuweereza w'ebintu bye nneetaaga;
26 kubanga yabalumirwa omwoyo mmwe mwenna, ne yeeraliikirira nyo, kubanga mwawulira nga yalwala:
27 kubanga okulwala yalwayali kumpi n'okufa: naye Katonda yamusaasira; so si ye yekka, naye era nange, ennaku endala zireme okweyongera ku nnaku ze nnina.
28 Kyenva njagala ennyo okumutuma, bwe mulimulaba nate mulyo: musanyuke, nange nkendeeze ku makuwala kwange.
29 Kale muwanirizanga mu Mukama waffe essanyu lyonna; era abafaanana oyo mubassengamu ekitiibwa:
30 kubanga yabulako katono afe w'omulimu gwa Kristo, bwe yaigawo obulamu bwe alyoke atuukirize ekyabulako mu kuweereza kwammwe gye ndi.
   

Essuula 3

[Ddayo waggulu]
1 Ebisigaddeyo, baganda bange, musanyukirenga Mukama waffe. Okubawandiikira ebimu tekunkonya nze, naye kuleeta mirembe gye muli.
2 Mwekuumenga embwa, mwekuumenga abakozi ababi, mwekuumenga abeesala:
3 kubanga ffe tuli abeekomola, abasinza ku bw'Omwoyo gwa Katonda, abeenyumiririza mu Kristo Yesu, era abateesiga mubiri:
4 newakubadde nga nze nnyinza n'okwesiga omubiri: omuntu omulala yenna bw'alowooza okwesiga omubiri, nze mmusinga:
5 nze eyakomolerwa ku lunaku olw'omunaana, ow'omu ggwanga lya Isiraeri, ow'omu kika kya Benyamini, Omwebbulaniya wawu; mu mateeka Mufalisaayo;
6 mu kunyiikira, nga njigganya ekkanisa; mu butuukirivu obuli mu mateeka, nnalabikanga nga ssiriiko kya kunenyezebwa.
7 Naye byonna ebyali amagoba gye ndi, ebyo nnabirowooza nga kufiirwa olwa Kristo.
8 Naye era n'ebintu byonna nnabirowooza nga kufiirwa olw'obulungi obungi obw'okutegeera Kristo Yesu Mukama wange: ku bw'oyo nnafiirwa ebintu byonna, era mbirowooza okubeera mpitambi, ndyoke nfune amagoba ye Kristo,
9 era ndyoke ndabikire mu ye, nga ssirina buruukirivu bwange obuva mu mateeka, wabule obutuukirivu obuliwo olw'okukkiriza Kristo, obuva eri Katonda mu kukkiriza:
10 ndyoke mmutegeere ye n'obuyinza obw'okuzuukira kwe n'okussa ekimu okw'ebibonoobono bye, nga mmufaanana ne mu kufa kwe;
11 bwe ndiyinza mu byonna byoana okutuuka ku kuzuukira kwe okuva mu bafu.
12 Si kugamba nti mmaza okuweebwa oba nti mmaze okutuukirizibwa: naye ngoberera era ndyoke nkikwate ekyo kye yankwatira Kristo Yesu.
13 Ab'oluganda, sseerowooza nze nga mmaze okukwata: naye kimu kye nkola, nga nneerabira ebyo ebiri ennyuma, era nga nkununkiriza ebyo ebiri mu maaso,
14 nduubirira okutuuka awawakanirwa awali empeera ey'okuyita kwa Katonda okwa waggulu mu Kristo Yesu.
15 Kale ffe fenna abaatuukirira, tulowoozenga ekyo: era bwe mulowooza ebirala mu kigambo kyonna, era Katonda alibabikkulira n’ekyo:
16 naye kyokka, kye tutuuseeko, tutambulirenga mu ekyo.
17 Ab'olugaada, mukkiriziganye wamu mungobererenga, era mulabirenga ku abo abatambula nga bwe mulina ffe okuba ekyokulabirako.
18 Kubanga bangi abatambula be nnababuulirako emirundi emingi, ne kaakano mbabuulira nga nkaaba amaziga, nga be balabe ab'omusalaba gwa Kristo:
19 enkomerero yaabwe kwe kuzikirira, katonda waabwe lwe lubuto, era ekitiibwa kyabwe kiri mu nsonyi zaabwe, balowooza bya mu nsi.
20 Kubanga ffe ewaffe mu ggulu; era gye tulindiririra Omulokozi okuvaayo, Mukama waffe Yesu Kristo:
21 aliwaanyisa omubiri ogw'okutoowazibwa kwaffe okufaananyizibwa ng'omubiri ogw'ekitiibwa kye, ng'okukola okwo bwe kuli okumuyinzisa n'okussa ebintu byanna wansi we.
   

Essuula 4

[Ddayo waggulu]
1 Kale, baganda bange abaagalwa be nnumirwa omwoyo, essanyu lyange era engule yange, muyimirirenga bwe mutyo okunywerera mu Mukama waffe, abaagalwa.
2 Mbuulirira Ewodiya, era mbuulirira Suntuke, balowoozenga bumu mu Mukama waffe.
3 Nate era naawe, muddu munnange ddala ddala, nkwegayiridde obeerenga abakazi abo, kubanga baakolanga emirimu wamu nange mu njiri, era ne Kulementi, n’abalala bakozi bannange, amannya gaabwe gali mu kitabo ky'obulamu.
4 Musanyukirenga Mukama waffe ennaku zonna: nate njogera nti Musanyukenga.
5 Okuzibiikiriza kwammwe kumanyibwenga abantu bonna. Mukama waffe ali kumpi.
6 Temweraliikiriranga kigambo kyonna kyonna; naye mu kigambo kyonna mu kusabanga n'okwegayiriranga awamu n'okwebazanga bye mwagala bitegeezebwenga eri Katonda.
7 N'emirembe gya Katonda, egisinga okutegeerwa kwonna, ginaabakuumanga emitima gyammwe n'ebirowoozo byammwe mu Kristo Yesu.
8 Ebisigaddeyo, ab'oluganda, eby'amazima byonna, ebisaanira ekitiibwa byonna, eby'obutuukirivu byonna, ebirongoofu byonna, ebyagalibwa byonna, ebisiimibwa byonna; oba nga waliwo obulungi, era oba nga waliwo ettendo, ebyo mubirowoozenga.
9 Bye mwayiga era ne muweebwa ne muwulira ne mulaba gye ndi, ebyo mubikolenga: ne Katonda ow'emirembe anaabeeranga nammwe.
10 Naye nsanyukidde nnyo Mukama waffe kubanga kaakano kye mujje musibuke okulowooza ebyange; naye ekyo okulowooza mwakirowoozanga, naye temwalina bbanga.
11 Si kubanga njogera olw'okwetaaga: kubanga nnayiga, embeera gye mbaamu yonna, obutabaako kye. nneetaaga.
12 Mmanyi okwetoowaza, era mmanyi bwe kiba okuba n'ebintu ebingi: mu buli kigambo ne mu bigambo byonna nnayiga ekyama ekiri mu kukkuta ne mu kulumwa enjala, okuba n'ebingi era n'okuba mu bwetaavu.
13 Nnyinzizza byonna mu oyo ampa amaanyi.
14 Naye mwakola bulungi okussa ekimu n'ebibonoobono byange
15 Era mmwe, Abafiripi, mumanyi nga mu kusooka kw'enjiri, bwe nnava mu Makedoni, nga siwali kkanisa eyassa ekimu nange mu kigambo eky'okugaba n'okuweebwa, wabula mmwe mwekka;
16 kubanga era ne mu Ssessaloniika mwaweereza omulundi gumu, era n'ogw'okubiri, olw'okwetaaga kwange.
17 Si kubanga nnoonya kirabo; naye nnoonya bibala ebyeyongera ku muwendo gwammwe.
18 Naye nnina ebintu byonna, ne nsukkirira: nzikuse, bwe nnamala okuweebwa Epafulodito ebyava gye muli, evvumbe eriwunya obulungi, ssaddaaka ekkirizibwa, esiimibwa Katonda.
19 Era Katonda wange anaatuukirizanga buli kye mwetaaga, ng'obugagga bwe bwe buli mu kitiibwa mu Kristo Yesu.
20 Era Katonda era Kitaffe aweebwenga ekitiibwa emirembe n'emirembe. Amiina.
21 Mulamuse buli mutukuvu mu Kristo Yesu. Ab'oluganda abali nange babalamusizza.
22 Abatukuvu bonna babalamusizza, naye okusinga ab'omu nnyumba ya Kayisaali.
23 Ekisa kya Mukama waffe Yesu Kristo kibeerenga n'omwoyo gwammwe.
   

Next
Back