Yakobo  

Essuula 1

1 Yakobo, omuddu wa Katonda ne Mukama waffe Yesu Kristo, eri ebika ekkumi n'ebibiri ebyasaasaana, mbalamusizza.
2 Mulowoozenga byonna okuba essanyu, baganda bange, bwe munaagwanga mu kukemebwa okutali kumu;
3 nga mutegeera ng'okugezebwa kw'okukkiriza kwammwe kuleeta okugumiikiriza.
4 Era omulimu gw'okugumiikiriza gutuukirirenga, mulyoke mubeere abaatuukirira, abalina byonna, abataweebuuka mu kigambo kyonna.
5 Naye oba ng'omuntu yenna ku mmwe aweebuuka mu magezi asabenga Katonda atamma awa bonna so takayuka; era galimuweebwa.
6 Naye asabenga mu kukkiriza, nga taliiko ky'abuusabuusa: kubanga abuusabuusa afaanana ng'ejjengo ery'ennyanja eritwalibwa empewo ne lisuukundibwa.
7 Kubanga omuntu oyo talowoozanga ng'aliweebwa ekintu kyonna eri Mukama waffe
8 omuntu ow'emyoyo ebiri, atanywera mu makubo ge gonna.
9 Naye ow'oluganda omukopi yeenyumirizenga olw'obukulu bwe:
10 era n'omugagga yeenyumirizenga olw'okukopawala kwe: kubanga aliggwaawo ng'ekimuli ky'omuddo.
11 Kubanga enjuba evaayo n'omusana omungi n'ewotosa omuddo; n'ekimuli kyagwo ne kigwa n'obulungi bw'ekifaananyi kyagwo ne bubula: era n'omugagga bw'atyo bw'aliwotoka mu kutambula kwe.
12 Alina omukisa omuntu agumiikiriza okukemebwa: kubanga' bw'alimala okusiimibwa aliweebwa engule ey'obulamu, Mukama waffe gye yasuubiza abamwagala.
13 Omuntu yenna bw'akemebwanga, tayogeranga nti Katonda ye ankema kubanga Katonda takemeka na bubi, era ye yennyini takema muntu yenna:
14 naye buli muntu akemebwa, ng'awalulwa okwegomba kwe ye n'asendebwasendebwa.
15 Okwegomba okwo ne kulyoka kuba olubuto ne kuzaala okwonoona: n'okwonoona okwo, bwe kumala okukula; ne kuzaala okufa.
16 Temwerimbalimbanga, baganda bange abaagalwa.
17 Buli kirabo kirungi na buli kitone kituukirivu kiva waggulu, nga kikka okuva eri Kitaffe ow'ebyaka, atayiriza kuba na kufuukafuuka newankubadde ekisiikirize eky'okukyuka.
18 Olw'okuteesa kwe yatuzaala n'ekigambo eky'amazima, tulyoke tubeere ng'omwaka omubereberye ogw'ebitonde bye.
19 Ekyo mukimanyi, baganda bange abaagalwa. Naye buli muntu iabeerenga, mwangu wa kuwulira, alwengawo okwogera, alwengawo okusunguwala
20 kubanga obusungu bw'omuntu tebukola butuukirivu bwa Katonda.
21 Kale muteekenga wala obugwagwa bwonna n'obubi obusukkiridde, mutoolenga n'obuwombeefu ekigambo ekisigibwa ekiyinza okulokola obulamu bwammwe.
22 Naye mubeerenga bakozi, ba kigambo, so si bawulizi buwulizi, nga mwerimbalimba.
23 Kubanga omuntu yenna bw'aba omuwulizi w'ekigambo, so nga si mukozi, oyo afaanana ng'omuntu leyeeiaba amaaso ag'obuzaaliranwa bwe mu ndabirwamu:
24 kubanga yeeraba n'agenda, amangu ago ne yeerabira bw'afaananye.
25 Naye atunula mu mateeka amatuukirivu ag'eddembe n'anyiikiriramu, nga si muwulizi eyeerabira naye mukozi akola, oyo anaaweebwaaga omukisa mu kukola kwe.
26 Omuntu yenna bwe yeerowooza nga wa ddiini, bw'ataziiza. lulimi lwe, naye nga yeerimba omutima gwe eddiini y’oyo teriiko kyegasa.
27 Eddiini ennongoofu eteriimu kko mu maaso ga Katonda Kitaffe ye eno, okulambulanga abafuuzi ne bannamwandu mu bunaku bwabwe, n'okwekuumanga obutaba na mabala ag'omu nsi.
   

Essuula 2

[Ddayo waggulu]
1 Baganda bange, temubanga na kukkiriza kwa Mukama waffe Yesu Kristo Ate ne muba n'okusosolanga mu bantu.
2 Kubanga bw'ayingira mu kkuŋŋaaniro lyammwe omuntu alina empeta eya zaabu ayambadde eby'obuyonjo, era n'omwavu ayambadde enziina n'ayingira,
3 nammwe ne mwaniriza ayambadde ebyambalo eby'obuyonjo, ne mwogera nti Ggwe tuula wano awalungi era ne mugamba omwavu nti Ggwe yimirira eri, oba tuula wansi awali akatebe k'ebigere byange;
4 nga temwawukanye mu mmwe mwekka, ne mufuuka abasazi b'ensonga ab'ebirowoozo ebibi?
5 Muwulire, baganda bange abaagalwa; Katonda teyalonda abalina obwavu bw'omu nsi okubeeranga n'obugagga obw'okukkiriza, n'okusikira obwakabaka bwe yasuubiza abamwagala?
6 Naye mmwe mwanyooma omwavu. Abagagga si be babajooga ne babawalula bennyini awasalirwa emisango?
7 Singa bavuma erinnya eddungi lye muyitibwa?
8 Naye bwe muba mutuukiriza etteeka lino eriri nga kabaka w'amateeka, nga bwe kyawandiikibwa nti Oyagalariga muntu munno nga bwe weeyagala wekka, mukola bulungi.
9 Naye bwe munaasosolanga mu bantu, nga mukoze kibi, ne musingibwa amateeka ng’abonoonyi
10 Kubanga omuntu yenna bw'aba akwata amateeka gonna, naye n'asobya mu limu, ng'azzizza omusango gwa gonna.
11 Kubanga oyo eyayogera nti Toyendanga, ate yayogera nti Tottanga. Kale bw'otoyenda naye n'otta, ng'ofuuse mwonoonyi w'amateeka.
12 Mwogerenga era mukolenga bwe mutyo ng'abagenda okusalirwa omusango n'amateeka ag'eddembe.
13 Kubanga omusango tegubaako kusaasirwa eri atasaasira: okusaasira kujaguliza ku musango.
14 Kigasa kitya, baganda bange, omuntu bw'ayogera ng'alina okukkiriza, naye n'ataba na bikolwa? Okukkiriza okwo kuyinza okumulokola?
15 Bwe wabaawo ow'oluganda omusajja oba mukazi nga bali bwereere, ng'emmere eya buli lunaku tebamala,
16 era omu ku mmwe bw'abagamba nti Mugende n'emirembe mubugume, mukkute, naye ne mutabawa omubiri bye gwetaaga; kigasa kitya?
17 Era n'okukkiriza bwe kutyo, bwe kutabaako bikolwa, wokka nga kufudde.
18 Naye muntu alyogera nti Ggwe olina kukkiriza, nange nnina ebikolwa: ndaga okukkiriza kwo awatali bikolwa byo, nange olwebikolwa byange ndikulaga okukkiriza kwange.
19 Okkiriza nga Katonda ali omu; kola bulungi: era ne bassetaani bakkiriza, ne bakankana.
20 Naye yagala okutegeera, ggwe omuntu taliimu, ng'okukkiriza awatali biolwa tekuliiko kye kugasa?
21 Ibulayimu jjajjaffe teyaweebwa butuukirivu lwa bikolwa, kubanga yawaayo Isaaka omwana we ku kyoto?
22 Olaba ng'okukkiriza wakolera wamu n'ebikolwa bye, era okukkiriza kwe kwatuukirizibwa olw’ebikolwa bye:
23 ekyawandiiibwa ne kituukirira ekyogera nti Ibulayimu n'akkiriza Katonda, ne kumubalirwa okuba obutuukirivu; ayitibwa mukwano gwa Katonda.
24 Mulaba ng'omutitu aweebwa butuukirivu lwa bikolwa, so si lwa kukkiriza kwokka.
25 Era ne Lakabu omwenzi bw'atyo teyaweebwa utuukirivu lwa bikolwa, kubanga asembeza ababaka, n'abayisa mu kubo eddala?
26 Kuba ng'omubiri watali mwoyo bwe guba nga gufude, era n'okukkiriza bwe kutyo watali bikolwa nga kufudde.
   

Essuula 3

[Ddayo waggulu]
1 Temubeeranga bayigiriza bangi, baganda bange, nga mumanyi ga tulisalirwa omusango ogusinga bunene.
2 Kubanga mu bingi tusobya fenna. Omuntu yenna bw'atasobya mu kigambo, oyo ye muntu yatuukirira, ayinza okuziyiza era omubiri gwe gwonna.
3 Naye we tuteeka ebyuma eby'embalaasi mu mimwa gyazo ziryoke zitugonderenga, tuyinza okufuga emibiri gyazo gyonna.
4 Laba, era n’amaato, newakubadde nga manene we gatyo, era nga gatwalibwa empewo ez'amaanyi, enkasi entono ennyo ye egagoba yonna yonna omugoba y'asiima mu kwagala kwe.
5 Era n’olulimi bwe lutyo kye kitundu ekitono, ne lwenyumiriza nnyo. Laba, emiti emingi egyenkanidde awo okwokebwa akaliro akatono bwe katyo.
6 N'olulimi muliro: ensi ey'obubi mu bitundu byaffe lwe lulimi, olwonoona omubiri gwonna, era olukoleeza nnamuziga w'ebitonde byonna, era olukoleezebwa Ggeyeena.
7 Kubanga buli ngeri ey'ensolo n'ennyonyi n'ebyewalula n'ebyennyanja bifugika era byafugibwa abantu:
8 naye olulimi siwali muntu ayinza kulufuga; bubi obutaziyizika, lujjudde obusagwa obutta.
9 Olwo lwe tutenderezesa Mukama waffe ye Kitaffe; era olwo lwe tukolimiza abantu abaakolerwa mu kifaananyi kya Katonda: mu kamwa akamu mwe muva okutendereza n'okukolima. Baganda bange, ebyo tekibigwanira kubeera bwe bityo.
10 mu kamwa akamu mwe muva okutendereza n'okukolima. Baganda bange, ebyo tekibigwanira kubeera bwe bityo.
11 Ensulo ekulukuta amazzi amalungi n'agakaawa mu liiso erimu?
12 Omutiini guyinza, baganda bange, okubala ezeyituuni, oba omuzabbibu okubala ettiini? So amazzi ag'omunnyo tegayinza kuvaamu malungi.
13 Ani alina amagezi n'okutegeera mu mmwe? Alagenga mu mpisa ennungi ebikolwa bye mu magezi amawombeefu.
14 Naye bwe muba n'obuggya obukambwe n'okuyomba mu mutima gwammwe, temwenytunirizanga so temulimbanga okuziyiza amazima.
15 Amagezi gano si ge gakka okuva waggulu, naye ga mu nsi, ga buzaaliranwa, ga Setaani.
16 Kubanga awaba obuggya n'okuyomba, we waba okutabuka na buli kikolwa ekibi.
17 Naye amagezi agava waggulu okusooka malongoofu, nate ga mirembe, mawombeefu, mawulize, agajjudde okusaasira n'ebibala ebirungi, agatalina kwawula, agatalina bunnanfuusi.
18 Era ekibala eky'obutuukirivu kisigibwa mu mirembe eri abo abaleeta emirembe.
   

Essuula 4

[Ddayo waggulu]
1 Entalo ziva wa n'okulwana kuva wa mu mmwe? Si muno, mu kwegomba kwammwe okulwana mu bitundu byammwe?
2 Mwegomba so temulina: mutta, era mwegomba, ao temuyinza kufuna: mulwana era mutabaala; temulina kubanga temusaba.
3 Musaba ne mutaweebwa, kubanga musaba bubi; mulyoke mubikoze okwegomba kwammwe.
4 Mmwe abakazi abenzi temumanyi ng'omukwano gw'ensi bwe bulabe bwa Katonda? Kale, omuntu yenna bw'ayagala okubeera mukwano gw'ensi yeefuula mulabe wa Katonda.
5 Oba mulowooza ng'ekyawandiikibwa kyogerera bwereere? Omwoyo gwe yatuuza mu ffe gwegomba okuleeta obuggya?
6 Naye yeeyongera okugaba ekisa. Kyekiva kyogera nti Katonda alwana n'ab'amalala, naye abawombeefu abawa ekisa.
7 Kale mujeemulukukirenga katonda; naye mulwanenga ne Setaani, naye anaabaddukanga.
8 Musembererenga Katonda, naye anaabasembereranga mmwe. Munaabenga mu ngalo, abalina ebibi; era mutukuzenga emitima gyammwe, mmwe abalina emmeeme ebbiri.
9 Munakuwale, mukube ebiwoobe, mukaabe: okuseka kwammwe kufuuke ebiwoobe, n'essaayu lifuuke okunakuwala.
10 Mwetoowazenga mu maaso ga Mukama waffe, naye alibagulumiza.
11 Temwogeraganangako bubi, ab'oluganda. Ayogera obubi ku w'oluganda, oba asalira omusango ow'oluganda, ayogera obubi ku mateeka, era asalira musango mateeka: naye bw'asalira omusango amateeka, nga toli mukozi wa mateeka, wabula omusazi w'omusango.
12 Eyateeka amateeka, era omusazi w'omusango, ali omu oyo ayinza okulokola n'okuzikiriza, naye ggwe asalira omusango munno ggwe ani?
13 Kale nno mmwe aboogera nti Leero oba jjo tunaagenda mu kibuga gundi; tulimalayo omwaka gumu tulitunda tuliviisa amagoba:
14 naye nga temutegeera bya nkya Obulamu bwammwe buli nga kiki? Muli lufu, olulabika akaseera akatono, ne lulyoka luggwaawo:
15 we mwandyogeredde nti Mukama waffe bw’alyagala tuliba balamu, era tulikola bwe tuti oba bwe tuti.
16 Naye kaakano mwenyumiriza mu kwekulumbaza kwammwe: okwenyumiriza kwonna okuli bwe kutyo kubi.
17 Kale amanya okukola obulungi n'atakola, kye kibi eri oyo.
   

Essuula 5

[Ddayo waggulu]
1 Kale nno mwe abagagga, mukaabe mulire olw'ennaku ezijja ku mmwe.
2 Obugagga bwammwe buvunze, n'ebyambalo byammwe biriiriddwa ennyenje.
3 Ezaabu yammwe ne ffeeza zitalazze; n'obutalagge bwazo buliba mujulirwa gye muli, bulirya omubiri gwammwe ng'omuliro. Mwakuŋŋaanyiza ebintu mu nnaku ez'enkomerero.
4 Laba, empeera y'abakozi abaakungula ennimiro zammwe, gye mulyazaamaanya, ekaaba: n'ebiwoobe by'abo abakungula byayingira mu matu ga Mukama Ow'eggye.
5 Mwesanyusa ku nsi, ne muwoomerwa ebinyumu; mwegezzezza mu mitima gyammwe nga ku lunaku olw'okubaaga ebya ssava.
6 Mwasala omusango okusinga omutuukirivu, ne mumutta; naye tabawakanya.
7 Kale, ab'oluganda, mugumiikirizenga okutuusa okujja kwa Mukama waffe. Laba, omulimi alindirira ebibala eby'ensi eby'omuwendo omungi, abigumiikiriza, okutuusa enkuba eya ddumbi n'eya ttoggo.
8 Era nammwe mugumiikirizenga; munywezenga emitima gyammwe: kubanga okujja kwa Mukama waffe kuli kumpi.
9 Temwemulugunyanga, ab'oluganda, mwekka na mwekka, muleme okusalirwa omusango: laba, omusazi w'emisango ayimiridde ku luggi.
10 Mutwale ekyokulabirako, ab'oluganda, eky'okubonyaabonyezebwa n'okugumiikiriza, bannabbi abaayogeranga mu linnya lya Mukama.
11 Laba, tubayita ba mukisa abaagumiikirizanga: mwawulira okugumiikiriza kwa Yobu, era mwalaba Mukama ku nkomerero bw'akola nga Mukama wa kisa kingi n'okusaasira.
12 Naye okusinga byonna, baganda bange temulayiranga newakubadde eggulu, newakubadde ensi, newakubadde ekirayiro ekirala kyonna naye ekigambo kyammwe weewaawo kibeerenga weewaawo, n'ekigambo kyammwe si weewaawo kibeerenga si weewaawo; muleme okugwa mu musaago.
13 Waliwo mu mmwe omuntu ali obubi? asabeaga. Waliwo asanyuka? ayimbenga eby'okutendereza Katonda.
14 Waliwo mu mmwe omuntu alwadde? ayitenga abakadde b'ekkanisa; bamusabirenga, nga bamusiigako amafuta mu linnya lya Mukama waffe:
15 n'okusaba kw'okukkiriza kulirokola omulwadde, ne Mukama waffe alimuyimusa: era oba nga yakola ebibi birimuggibwako.
16 Kale mwatuliraganenga ebibi byammwe mwekka na mwekka, musabiraganenga, mulyoke muwone. Okusalia kw'omuntu omutuukirivu kuyinza nnyo mu kukola kwakwo.
17 Eriya yali muntu eyakwatibwa byonna nga ffe, n'asaba nnyo enkuba ereme okutonnya; enkuba n'etatonnya ku nsi emyaka esatu n'emyezi mukaaga.
18 N'asaba nate; eggulu ne litonnyesa enkuba, ensi n'emeza ebibala byayo.
19 Baganda bange, omuntu yenna mu mmwe bw'akyamanga okuva mu mazima, omuntu n'amala amukyusa,
20 ategeerenga ng'akpusa alina ebibi mu bukyamu obw'ekkubo lye alirokola obulamu mu kufa, era alibikka ku bibi bingi.
   

Next
Back